Kryeministri i Kosovës, Avdullah Hoti i ka uruar shërim të shpejtë kryetarit të Lëvizjes Vetëvendosje, Albin Kurtit, pas infektimit me coronavirus. Hoti ka thënë se shpreson që Kurti ta kalojë sa më lehtë gjendjen shëndetësore me COVID-19, ndërsa vetë ai ka qenë po ashtu i infektuar më herët.
“Kryetarit të Lëvizjes Vetëvendosje, Albin Kurti, i dëshiroj që ta kaloj sa më lehtë gjendjen shëndetësore me COVID-19. Zotit Kurti dhe të gjithë të prekurve tjerë i uroj që sa më lehtë t’i përballojnë simptomat dhe t’i kthehen angazhimeve të përditshme”, ka thënë Hoti në një postim në profilin e tij në Facebook. Kurti sot bëri të ditur se është në vetë-izolim pasi që është infektuar me COVID-19, dhe ka shfaqur shenjat e para të sëmundjes.
“Të nderuar anëtarë të Lëvizjes e qytetarë të Republikës. Parmbrëmë kisha disa simptoma: kokëdhembje të lehtë, pak koll dhe dhembje e skuqje të syve. Dje jam testuar për COVID-19 dhe kam rezultuar pozitiv. Në dy javët në vijim do të qëndroj në vetizolim”, ka shkruar Kurti në Facebook.