Guardia di Finanza Italiane ka vënë në sekuestrim 20 tonë perime të ardhura nga Shqipëria. Janë speca, domate e patëllxhanë, të cilat shiteshin në Itali sikur të ishin prodhime “made in Itali”. Operacioni i mashtrimit u identifikua pas një kontrolli në territor nga reparti operativ i Guardia di Finanza italiane në Molfetta.
Gjatë kontrollit të një automjeti tip TIR i drejtuar nga një shofer shqiptar u zbuluan kutia me perime mbi të cilat ishte shkruar “made in Itali”. Malli kishte si destinacion tregun e shitjes në rajonin e Venetos. Kontrolli i dokumentacionit shoqërues të kutive me perime zbardhi mashtrimin.
Rreth 20 tonë perime të ardhura nga Shqipëria të një kualiteti mjaft të mirë, u vunë nën sekuestrim ligjor. Përgjegjësit e këtij trafiku të parregullt produktesh, si kompania kontraktuese e ajo transportuese janë sinjalizuar në Prokurorinë Italiane e janë në dispozicion të autoriteteve gjyqësore.
