Një tjetër rast mashtrimi nga Florian Gjergji, i njohur nga autoritetet për skema të ndryshme mashtruese. I riu nga Shkodra, i cili dyshohet se ndodhet në Gjermani ka arritur që të fusë në kurth një kambist nga Durrësi.
Përmes mesazheve, Gjergji i është prezantuar kambistit si kushëriri i një biznesmeni të fuqishëm.
Duke shfrytëzuar faktin se kambisti kishte shoqëri me një kushëri të biznesmenit, Gjergji i ka kërkuar 60 mijë euro, shumë të cilën e ka orientuar që t’ia dorëzojë një personi tjetër pranë një qendre tregtare.
Pas marrjes së shumes, personi i dërguar për të tërhequr paratë është larguar drejt Elbasanit, ku është takuar me një tjetër person, i cili ka mbërritur me taksi nga një fshat.
Mashtrimi është zbuluar vetëm pasi kambisti ka kontaktuar mikun e tij për t’i konfirmuar se kishte kryer “porosinë”. Në atë moment ai ka kuptuar se personi që njihte nuk i kishte kërkuar asnjë shumë parash dhe se kishte rënë pre e një skeme mashtrimi.
Rasti është denoncuar në polici nga kambisti, ndërsa dy personat që dyshohet se morën dhe transportuan paratë janë arrestuar. Në dëshmitë e tyre ata kanë deklaruar se janë kontaktuar dhe udhëzuar nga Florian Gjergji.
Florian Gjergji është një emër i njohur për policinë për rastet e mashtrimit. Emri i tij ka dalë shpeshherë në skenë pasi ka shfrytëzuar emra të rëndësishëm politikanësh për të marrë para nga njerëz të caktuar.
