Aleanca për Mbrojtejen e Teatrit ka thirrur sot një protestë. Disa minuta para nisjes së saj forcat e policisë janë mobilizuar në hyrje të pedonales në Bulevardin Zogu i Parë ku priten të mblidhen protestuesit. Në pamjet nga vendi ku do të mbahet protesta tregojnë një numër më të ulët të forcave të policisë në krahasim me ditën e hënë. Burime në media raportojnë për rreth 300 forca policie.
Ndërkaq janë moblizuar gjithashtu edhe autobotët me ujë dhe forcat speciale të cilat do të vëzhgojnë nga taracat e godinave përreth. Aktivistët kanë nistur të vendosin gjithashtu banderolat. Ajo që bie në sy është rrethimi i pjesës së hyrjes së pedonales me një shirit ku shkruhet “skenë krimi”. Në postera të tjerë ironizohet kryeministri Rama dhe ish-ministri i Brendshëm Saimir Tahiri.
Ditën e hënë Aleanca për Mbrojtjen e Teatrit mbajti protestën e parë për shembjen e godinës së Teatrit Kombëtar, ngjarje të cilën ata e kanë konsideruar një krim dhe kanë kërkuar hetim nga SPAK. Protesta e tyre është kundër qeverisë dhe gjithashtu kërkohet dorëheqja e kryebashkiakut të Tiranës, Veliaj. Tubimi ishte paqësor dhe konsistoi në fjalime të disa prej aktivistëve të aleancës. Robert Budina deklaroi në protestën e parë se ajo është e hapur për të gjithë ata që besojnë në kauzën e aktivistëve të teatrit. /Opinion.al
