Një skemë e mirëorganizuar mashtrimi online po përdor lajme të rreme për vdekjen ose arrestimin e personazheve të njohur shqiptarë, me synimin për të tërhequr klikime dhe për të shitur produkte të dyshimta shëndetësore. Në qendër të kësaj skeme janë faqe në rrjete sociale që publikojnë tituj ekstremë dhe emocionalë, duke njoftuar rrejshëm ngjarje tragjike. Postimet drejtojnë lexuesit drejt lidhjeve të fshehura, të cilat hapin faqe interneti me tekste të gjeneruara nga inteligjenca artificiale.
Këto faqe janë të mbushura me reklama për suplemente bimore që pretendojnë të kurojnë sëmundje të ndryshme. Përdoruesit nxiten të veprojnë shpejt, përmes presionit psikologjik dhe ofertave të kufizuara në kohë. Kur viktimat plotësojnë formularët online, ato kontaktohen nga marketues, të cilët i bindin të blejnë produktet. Pagesa kryhet zakonisht në momentin e dorëzimit në shtëpi, ndërsa mashtrimi zbulohet vetëm pas marrjes së produktit.
Për ta bërë skemën më të besueshme, faqet përdorin dizajne që imitojnë media serioze, adresa interneti me hostim të lirë dhe dëshmi të rreme nga mjekë fiktivë. Në disa raste, përmbajtja shoqërohet edhe me video të publikuara në platforma të tjera, të realizuara po ashtu me zëra dhe imazhe të gjeneruara artificialisht.
Kanalet që shpërndajnë këto video kanë qindra mijëra ndjekës dhe miliona shikime, duke e zgjeruar ndjeshëm shtrirjen e skemës. Përmbajtja shpesh është e njëjtë në disa faqe të ndryshme, të cilat krijohen dhe mbyllen brenda një periudhe të shkurtër. Qëllimi i gjithë këtij mekanizmi nuk është informimi, por përfitimi financiar përmes komisioneve nga shitja e produkteve. Çdo klikim dhe çdo porosi gjurmohet automatikisht përmes kodeve digjitale, duke siguruar pagesën për ndërmjetësit që shpërndajnë përmbajtjen mashtruese.
