Gjendet i pajetë në malin e Bulqizës, ekspertiza zbulon plagë plumbi në gjoksin e 53-vjeçarit, dyshime për vrasje
Një 53-vjeçar nga Bulqiza është gjetur i pajetë ditën e djeshme në malin e Bulqizës, ndërsa ekspertiza mjeko-ligjore ka zbuluar elementë të rinj që kanë ndryshuar drejtimin e hetimeve.
Viktima, i identifikuar me inicialet U. Fiku, dyshohet se ka një plagë të shkaktuar nga arma e zjarrit. Gjatë ekzaminimit në Tiranë, në pjesën e gjoksit të tij është konstatuar një predhë plumbi.
Fillimisht, dyshimet ishin se 53-vjeçari mund të ishte sulmuar nga kafshë të egra, por zbulimi i plagës ka ngritur dyshime për një ngjarje kriminale.
Prokuroria dhe grupi hetimor po vijojnë hetimet për të përcaktuar shkakun e saktë të vdekjes dhe për të zbardhur rrethanat e ngjarjes.
