Grabitja e bankës në Tiranë, autori i maskuar merr 60 mijë euro për 3 minuta dhe largohet me monopatinë
Vetëm tre minuta i kanë mjaftuar një grabitësi të maskuar dhe të armatosur për të boshatisur arkën e një banke të nivelit të dytë në zonën e Komunës së Parisit, në Tiranë, paraditen e kësaj të hëne.
Pamjet e kamerave të sigurisë, të cilat tashmë janë në duart e hetuesve, kanë ndihmuar në rindërtimin e dinamikës së grabitjes. Nga veprimet e autorit dyshohet se ai e njihte mirë planimetrinë e bankës dhe mënyrën e funksionimit të saj.
Sapo ka hyrë në ambientet e bankës, i maskuar me skafandër dhe me pistoletë në dorë, ai ka kërcënuar rojën e sigurisë, duke e izoluar në pjesën fundore të objektit.
Më pas, grabitësi ka kapërcyer banakun e arkës dhe ka marrë paratë që ndodheshin në sirtar. Sipas të dhënave paraprake, shuma e grabitur dyshohet se arrin në rreth 60 mijë euro.
Pas krimit, autori është larguar i qetë nga zona, duke përdorur një monopatinë elektrike. Fatmirësisht, gjatë grabitjes nuk raportohet për persona të lënduar.
Policia e Tiranës ka ngritur një grup të posaçëm hetimor dhe po punon në disa pista për identifikimin dhe kapjen e autorit, i cili vijon të jetë ende i paidentifikuar.
