Gjykata e Tiranës ka vendosur të lërë në burg shtetasit Bedri dhe Albert Vodha, babë e bir të cilët akuzohen se mashtronin biznesmenë, duke u shtirur si zyrtarë dhe iu premtonin favore në këmbim të shumave monetare.
Ata u kapën në flagrancë duke i marrë një biznesmeni përmes mashtrimit një shumë prej 100.000 euro, janë lënë në burg.
Gjykata e Tiranës la caktuar masën e sigurisë “arrest me burg” për baba e bir për kryerjen e veprës penale të “Mashtrim”.
Bedri dhe Albert Vodha, përkatësisht 54 dhe 24 vjeç, në bashkëpunim me Florian Gjergji, akuzohet se u prezantoheshin biznesmenëve në rrjetet sociale si zyrtarë dhe me anë të mashtrimit u merrnin shuma të konsiderueshme parash.
Ky i fundit, i cili dyshohet si organizatori i kësaj veprimtarie kriminale, është shpallur në kërkim nga policia.
Gjithashtu dyshohet se këta 3 shtetas janë autorë edhe të një rasti tjetër të ngjashëm, të ndodhur në muajin mars të këtij viti, në Tiranë, ku me anë të mashtrimit, duke u prezantuar si zyrtarë të lartë, i kanë marrë një shumë të madhe parash një biznesmeni.
SKEMA
Mësohet se ata i shkruanin biznesmenëve në platformën “Telegram” duke u shtirur se ishin të afërm të një politikani. Fillimisht skema e mashtrimit niste në “Telegram”, ku organizator ishte shtetasi Florian Gjergji, i cili i shkruante biznesmenëve duke i thënë “jam i afërm i x politikani” dhe më pas pretendonte se ishte zyrtar i lartë në shtet dhe në këmbim të parave u premtonte favore apo ndikim në shtet në lidhje me bizneset.
Ndërkohë ky shtetas nuk dilte vetë në terren për të marrë shumën e të hollave për të cilat ishte dakorduar me “viktimën”, por një detyrë të tillë e kryenin Bedri dhe Albert Vodha.
Policia ra në gjurmën e grupit, pasi në muajin ,mars një tjetër biznesmen kishte rënë pre e mashtrimit të tyre.
Ky ishte momenti ku policia vendosi grupin nën përgjim, deri në ,momentin kur grupi u riaktivizua dhe tentoi të mashtronte viktimën e radhës. Kujtojmë se organizatori i grupit, është ende i shpallur në kërkim dhe se po punohet për kapjen e tij.
