Këtë fundvit, “Klanifornia” riktheu në ekran “SHBLSH”; grupi i njohur i humorit i përbërë nga Gent Zenelaj, Jul Deda dhe Ermal Mamaqi, Përpos të tjerave, ky ribashkim ngjalli interes sepse njerëzit ishin kureshtarë të shihnin bashkë Gent Zenelajn dhe Jul Dedën që prej vitesh nuk flisnin me njëri tjetrin. Konflikti i tyre jo pak herë është bërë publik, por tani kjo i përket të shkuarës. I ftuar në “Rreze Dielli”, Jul Dedaj tregoi se si ishte momenti i pajtimit me Zenelajn, pikërisht gjatë rikthimit të “SHBLSH” natën e ndërrimit të viteve.
“U rikthyem sikur të mos kishte ndodhur asgjë. Treshja jonë është një treshe organike, jo e stisur. Ribashkimi ishte krejt i thjeshtë, sikur të mos kishte ndodhur asgjë. Edhe me Gentin ishte e njëjta gjë, edhe pas shumë vitesh që nuk flisnim. Kur pimë kafen e parë, kuptuam që nuk kishte asgjë për të sqaruar, as nuk kemi pse merremi. Boll është koha që humbëm këto vite që nuk kemi patur bashkëpunim dhe s’ja vlen të humbasim më asnjë minutë nga sot e mbrapa.”- u shpreh Juli.
Përsa i përket rikthimit të grupit që fillesat i kishte në “Portokalli”, Deda tha se bashkimi nuk ishte vetëm për një natë, pasi SHBLSH ka ndërmend të shfrytëzojë dëshirën e publikut për t’i parë bashkë.
