Janë identifikuar vetëm 2 prej 4 shqiptarëve që kanë arritur të arratisen nga Komisariati i Çanisë. Njëri prej të arratisurve i cili cilësohet edhe si më i rrezikshmi është Olis Thoma Prifti. 43-vjeçari me origjinë nga Dropulli është dënuar në vitin 2016 dhe ndaj tij rëndojnë akuzat e “pjesëmarrjes në grup kriminal”, “grabitje”, “grabitje me pasojë vdekjen”, “vjedhje”, “armëmbajtje pa leje” dhe “përdorim arme.
Shqiptari është arrestuar në vitin 2016, pasi gjatë një grabitjeje me bandën e tij shqiptare mbeti e vdekur një 84-vjeçare. Ndërkohë i arratisuri tjetër është identifikuar si Ardian Meta, 32 vjeç nga Divjaka i dënuar për grabitje. Ndërkohë të arratisur janë edhe dy shqiptarë të tjerë, një 34-vjeçar shqiptar me iniciale F.F i dënuar për trafik droge dhe një 29-vjeçar me mbiemrin B i dënuar për trafik droge.
Katër shqiptarët dhe një pakistanez kanë ngritur në këmbë policinë në Kretë dhe gjithë Greqinë pasi arritën të arratiseshin nga Komisariati i Çanisë. Të arrestuarit kanë arritur të arratisen nga tualeti i qendrave të paraburgimit pa u vënë re.
Sipas mediave arratisja e të dënuarve ka ndodhur mbrëmjen e së dielës (06.02.2022) nga Komisariati i Çanisë . Pesë të arrestuarit sipas informacioneve të deritanishme kanë arritur të presin hekurat në dritare nga tualeti i qendrës së paraburgimit. Por ka informacione se ata mund të kenë thyer edhe murin për të dalë më lehtë nga aty ku ishin futur.
