Një anije mallrash me flamur të Panamasë, u përfshi nga zjarri teksa ndodhej në pritje të ankorimit në Portin e Durrësit.
Anija “Kledes Mary” me pronar shqiptar, ndodhej në radën e portit.
Mesditën e kësaj të shtune ekuipazhi ka konstatuar tym, ndërsa menjëherë është lëshuar alarmi.
Nga Porti i Durrësit është nisur rimorkiatori i cili ka hedhur ujë në vendin ku kishte shpërthyer zjarri dhe pas 4 orësh flakët janë shuar.
Kapiteneria e Portit të Durrësit
Rreth orës 14:01 salla e monitorimit të kapitenerisë së Portit të Durrësit vuri se nga anija “Kledes Mary” me flamur panamez por me pronar shqiptar, e cila ndodhej në radën e Portit Durrës po dilte tym. Menjëherë njoftoi QNOD, policinë e kufirit dhe Rojën Bregdetare për organizimin e operacionit të shuarjes së zjarrit dhe shpëtimit të ekuipazhit.
Me urdhër të kapitenerisë së Portit Durrës drejt anijes u nis rimorkiatori i cili filloi të hidhte ujë në kiçin e anijes ku kishte shpërthyer zjarri.
Në ndihmë erdhi edhe anija e rojes bregdetare të cilat pas 4 orë përpjekjesh bënë të mundur shuarjen e zjarrit dhe shpëtimin e ekuipazhit dhe anijes. Një ndihmë të madhe dhanë edhe punonjësit e zjarrfikësve të Portit Durrës të cilët hynë në brendësi të anijes me bombula oksigjeni dhe kontrolluan anijen për vatra të pashuara dhe për të siguruar shuarjen plotësisht të zjarrit.
