Pas datës 1 janar 2019, kazinotë do të jenë dhe do të funksionojnë sipas ligjit, vetëm në zona të caktuara, që janë kazinotë në hotele me 5 yje apo në resorte të cilat do të licensohen.
Kështu deklaron Niko Lera, drejtor i Politikave Fiskale në Ministrinë e Financave dhe Ekonomisë për ATSH-në ndërsa sqaron projektligjin e propozuar nga kryeministri Edi Rama për lojërat e fatit.
Lera tha se masat e ndërmarra nga qeveria, që në vitin 2013 për formalizimin e këtij tregu, kishin për synim kufizimin e tyre, reduktimin e informalitetit dhe kontrollin e këtyre subjekteve.
“Kjo është një masë, që e mori qeveria në kuadër të kufizimit të këtij biznesi që ka filluar që në vitin 2013 dhe jeni në dijeni të aksionit kundër informalitetit në sektorin e lojërave të fatit dhe ky është hapi i fundit që ndërmerret në kuadër të kufizimit të këtij biznesi”, tha Lera.
Për hir të së vërtetës, shpjegoi ai, qeveria ka ndërmarrë masa ndër vite për ta kufizuar këtë biznes, si p.sh, nëpërmjet kufizimit të numrit të operatorëve, ku kemi pasur 42 operatorë në vitet 2013-2014 dhe aktualisht janë 20 operatorë në treg, është rritur barra fiskale nga 0% të ardhura nga fituesit është rritur në 15% , 10% tatim fitimi i kompanive të lojërave të fatit është rritur në 15%, e të tjera masa që janë marrë për licencimin, kontrollin dhe kufizimin e tyre.
