Kryetari i PD-së, Lulzim Basha që në nisje të deklaratës së tij me gazetarët, ka pranuar humbjen e zgjedhjeve të pjesshme lokale të 6 marsit.
Ai tha se do të mbajnë përgjegjësi të gjithë, duke nisur nga ai.
“Ka patur një mbledhje të grupit të deputetëve që një ditë më pas, një mbledhje të grupit të kryetarëve, Kolegjin e Kryetarëve, do të vazhdojë me mbledhjen e Kryesisë. Pra jemi në një proces të thellë reflektimi pas të cilit padiskutim do të marrim përgjegjësitë nga unë i pari!”, tha ai.
Kreu i PD-së, Lulzim Basha deklaroi se demokratët do të marrin në dorë fatin e tyre, ndërsa shtoi se zgjedhjet e 6 marsit ishin mësim i madh dhe domosdoshmëri për të qenë të bashkuar.
Lideri demokrat tha se është i gatshëm që PD të jetë e fortë dhe e bashkuar.
“Pra, jemi në një proces reflektimi të brendshëm, disa prej tyre kanë kërkuar edhe analizë specifike për 6 bashkitë. Ju siguroj që demokratët do të marrin në dorë fatet e tyre, Partia Demokratike do të dalë nga ky proces e fortë dhe e bashkuar. Ky është synimi dhe në funksion të saj që padiskutim që detyra dhe përgjegjësia e parë është e imja dhe unë jam i gatshëm të ndërmarr çdo hap që Partia Demokratike të jetë e fortë, e bashkuar dhe të dali nga 6 marsi, nga humbja e 6 marsit të mos humbi mësimin e madh të 6 marsit që është domosdoshmëria për të qenë sa më të fortë dhe sa më të bashkuar përballë këtij regjimi.
Sot po diskutohet për Komisionin e Inceneratorëve, shpresoj t’i japin një vëmendje se është bërë gjithë ajo punë dhe e meriton, Partia Demokratike, anëtarët tanë të komisionit, qytetarët e meritojnë transparencën në Komisionin e Inceneratorëve. Ndërkohë po bëhet nami me naftën dhe i pari i qeverisë ia ka mbathur për në Dubai. Të merremi me këto. Procesi i reflektimit nisi dhe do të vazhdojë.”, tha Basha.
