Në emisionin “Historia ime” në Tv Klan, ka qenë e ftuar gazetarja Ketrin Gjocaj e cila ka dhënë një kontribut 30-vjeçar në ekran duke sjellë formate të ndryshme televizive ndër vite. Për herë të parë ajo ka folur në këtë intervistë për divorcin që ka pasur para shumë vitesh dhe marrëdhënien që ka me vajzën e saj e cila ka jetuar që e vogël në Gjermani me të atin.
Mirela Milori: Dua të më japësh një përgjigje të sinqertë, je divorcuar herët nga babai i vajzës tënde, si ka qenë, sepse Shqipëria edhe sot është pak e vështirë. Ti si e ke kaluar divorcin?
Ne kemi qenë 6-7 vjet martuar, kemi qenë të lidhur më herët, të fejuar qëndruam 7 vjet. Ajo që luajti rol në këtë mënyrë jetese të ndarë, ishte dhe largësia, sepse që në ’91-shin bashkë me vajzën, me vjehrrën time, gjithë familja shkoi në Gjermani, në ato kushte që kishte Shqipëria atëherë, sepse edhe ata nga ana e mamasë kishin probleme të persekutimit, të një jete me probleme në Shqipëri. Që aty filloi një gjë që nuk shkonte, sepse unë e dashuruar me ekranin, me një familje normale. Ne vazhdojmë të kemi marrëdhënie shumë të mirë, edhe kjo gjë duhet thënë, nuk ndodh në të gjitha çiftet.
Mirela Milori: Vajza u rrit në Gjermani, ku është zgjedhja më e mirë besoj, pavarësisht se ti si e ke përjetuar?
Ketrin Gjocaj: Kjo nuk ka kaluar lehtë, unë detyrohesha që 2-3 herë në vit të shkoja në Gjermani që atëherë ishte shumë problem dhe për viza. Ato fillime i kam patur problem, por raporti nuk ndryshoi, ka qenë shumë i mirë. Keti tregon se ka kaluar shumë momente të vështira dhe të mërzitura gjatë jetës që mund të ketë qarë dhe të jetë ndjerë pesimiste, por duke patur një familje të mirë, punën dhe uronte që vajza e saj të kishte vetëm shëndetin.
