Një konflikt i pazakontë ka ndodhur këtë të hënë në qytetin e Durrësit, ku një lojë dominoje mes dy të moshuarve është kthyer në skenë dhune, duke përfunduar me një plagosje me thikë.
Ngjarja ka ndodhur rreth orës 15:00, në sheshin “Pranvera”, një zonë e frekuentuar në qendër të qytetit. Sipas burimeve nga policia, debati verbal mes dy burrave të moshuar ka degjeneruar në përplasje fizike, ku njëri prej tyre ka nxjerrë një mjet prerës dhe ka goditur tjetrin.
I plagosuri është dërguar me urgjencë në Spitalin Rajonal të Durrësit, ku ndodhet jashtë rrezikut për jetën, ndërsa autori i dyshuar është shoqëruar në komisariat, ku po merret në pyetje lidhur me rrethanat e ngjarjes.
Policia ka nisur hetimet për zbardhjen e plotë të konfliktit, ndërsa pritet që dëshmitarët në zonë të ndihmojnë në dokumentimin e dinamikës së ngjarjes.
Durrës
Plagosi me mjet prerës (thikë), një 70-vjeçar, gjatë një konflikti për motive të dobëta, kapet menjëherë nga shërbimet e Policisë dhe shoqërohet në komisariat, autori i dyshuar.
Në lagjen nr. 11, Durrës, gjatë një konflikti për motive të dobëta, shtetasi A. Zh., 68 vjeç, dyshohet se ka plagosur me mjet prerës (thikë), shtetasin F. T., 70 vjeç, i cili ndodhet në spital, në kujdesin e mjekëve.
Shërbimet e Policisë, pas marrjes së njoftimit, brenda pak minutash kanë bërë të mundur kapjen dhe shoqërimin e shtetasit A. Zh. në Komisariat, për veprime të mëtejshme.
Vijon puna për dokumentimin e plotë të kësaj ngjarjeje.
