Korçë, Vijon operacioni policor i koduar “Basti i fundit”, për goditjen e organizimit të aktivitetit të kundërligjshëm të lojërave të fatit.
Sekuestrohen një celular që përdorej për vendosjen e basteve sportive dhe një sasi e vogël lënde narkotike kanabis.
Vihet në pranga poseduesi i tyre.
Shërbimet e Komisariatit të Policisë Korçë, në bashkëpunim me specialistët e Seksionit për Hetimin e Narkotikëve në DVP Korçë, në vijim të operacionit policor “Basti i fundit”, për goditjen e aktivitetit të paligjshëm në fushën e organizimit të lojërave të fatit, prodhimit dhe shitjes së narkotikëve, kanë vijuar të ushtrojnë kontrolle në ambiente të ndryshme të qytetit të Korçës, si rezultat i të cilëve u bë arrestimi në flagrancë i shtetasit A. Q., 46 vjeç, banues në Korçë.
Gjatë kontrollit të ushtruar nga shërbimet e Policisë, në një lokal, në lagjen nr. 10, Korçë, këtij shtetasi iu gjet një celular që dyshohet se përdorej për organizimin e lojërave të fatit.
Gjithashtu në banesën e tij, iu gjet një sasi e vogël lënde narkotike kanabis, e cila u sekuestrua në cilësinë e provës materiale, së bashku me telefonin. Materialet i kaluan Prokurorisë pranë Gjykatës së Shkallës së Parë Korçë, për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Prodhimi dhe shitja e narkotikëve”.
