Shqipëria ka fituar në ndeshjen miqesore ndaj Kosovës me rezultatin 2-1. Golat për Shqipërinë u shënuan nga Balaj dhe Uzuni , ndërsa për kosovarët golin e vetëm e shënoi Murriqi me anë të penalltisë. Kjo miqësorja, shërben si një test për të parë nivelin e ekipeve respektive në prag të ndeshjeve të ardhshme në Ligën e Kombeve.
Takimi nis i qetë, me dy ekipet që kanë mungesa të shumta në këtë ndeshje. Shkodrani Bekim Balaj zhbllokoi rezultatin në minutën e 31. Myrto Uzuni u shkëput bukur në të majtë të sulmit kuqezi dhe lëshoi një asist fantastik për Balajn, i cili në zgjatje e sipër, e dërgoi topin në portën e Kosovës. Pjesa e dytë nisi me Kosovën më kërkuese, ku spikati në disa raste Zhegrova, por në momentin më të mirë të tyre, Shqipëria shënon edhe golin e dytë. Selahi niset në kundërsulm, ndërsa në fund pason për Uzunin që tregohet i saktë. Në minutën e 83, Muriqi fiton një 11-metërsh, pas një ndërhyrje të parregullt të të riut Çepele. Ekzekutimin e penalltisë e kreu Muriqi, duke ngushtuar diferencën.
