Napoli u rikthye mbrëmjen e kaluar te trofetë pas gjashtë viteve. Skuadra jugore kishte triumfuar për herë të fundit në 2014, vit kur fitoi Kupën dhe Superkupën e Italisë.
Skuadra e Gennaro Gattusos zhvilloi një ndeshje shumë të mirë përballë Juventusit në finalen e Kupës së Italisë dhe ia doli të triumfonte pas goditjeve të penalltive.
Trofeu i parë për trajnerin kalabrez dhe hera e gjashtë që Napoli fiton Kupën. Tifozët nuk janë kursyer dhe kanë festuar gjatë suksesin kundër bardhezinjve të Sarrit. I lumtur për këtë arritje është edhe Diego Maradona.
Legjenda argjentinase dhe idhulli i përjetshëm i popullit napolitan, ka shfaqur gëzimin e tij në rrjetet sociale. “Jam krenar për ju. Forca Napoli“, shkruan Maradona në faqen zyrtare në Facebook, aty ku shfaqet me një fanellë të ish-skuadrës së tij.
