Kryeministri i Hungarisë, Viktor Orban u shpreh sot se Bashkimi Evropian “ka bërë gabime të mëdha” në pesë vitet e fundit, sa i përket migrimit dhe ekonomisë.
Sipas Orbanit, Komisioni Evropian duhet të lejojë që Këshilli i ministrave të Brendshëm të BE-së të vendosë për çështjet e migracionit, dhe e kritikoi gjithashtu për atë që ai e quajti “aktivizëm politik”, që sipas tij, ka nisur një sërë procedurash mbi Qeverinë hungareze lidhur me çështjet që konsiderohen se janë kundër rregullave të BE-së.
Orban pritet të takohet me presidenten e re të Komisionit Evropian, Ursula von der Leyer javën e ardhshme në Bruksel. Kryeministri hungarez e ka mbështetur kandidaturën e von der Leyer dhe ka thënë se pret që ajo të ketë një qëndrim më miqësor ndaj Hungarisë dhe vendeve të tjera në rajon, të cilat kanë kundërshtuar politikat e BE-së sa i përket migrimit.
Ndërkaq, duke folur për ekonominë, Orban tha se është koha që të rikthehet, atë që ai e quajti “ekonomia konkuruese evropiane”, me hapjen e më shumë vendeve të punës dhe “uljen e taksave”
Kujtojmë se në vitet e fundit, BE-ja ka kritikuar Hungarinë për ligjet që kanë kufizuar të drejtat e azilkërkuesve, por edhe për legjislacione të tjera, siç mund të jetë ai për taksa ndaj kompanive mediatike private, bankave dhe kompanive të huaja.
