Projekti për rehabilitimin e lumit Gjanica dhe rikonceptimin e qendrës së Qytetit të Fierit është drejt përfundimit. Ky projekt synon të rikthejë Lumin Gjanica në një nga asetet natyrore më të rëndësishme të zonës urbane të qytetit të Fierit dhe të rikonceptojë një shesh qendror, i cili ka munguar për qytetin.
Lirimi i hapësirave publike dhe shtimi i sipërfaqeve të gjelbëruara në zonë, kryesisht përgjatë brigjeve të lumit dhe përgjatë rrugëve; sistemimi i infrastrukturës nëntokësore dhe mbitokësore; konceptimi i disa minishesheve dhe akseve për të krijuar lidhje me parkun qendror të qytetit, janë disa nga objektivat e projektit, që do t’i japë qytetit një dimension të ri urban.
Ka përfunduar parkimi nëntokësor dhe shtrimi me pllaka guri i sheshit qendror të qytetit. Ndërkohë po punohet me realizimin e shkallareve, trotuarëve me pllaka guri dhe zonave të gjelbra përgjatë lumit Gjanica.
