Kryeministri i Maqedonisë së Veriut dhe kryetari i Lidhjes Socialiste Demokrate të Maqedonisë, Zoran Zaev, është dorëhequr nga të dyja postet që mbante.
Shkak për këtë vendim të beftë, ka qenë rezultati i dobët i forcës politike që ai drejtonte, në zgjedhjet lokale. Zaev i cilësoi zgjedhjet si një humbje të madhe, duke dhënë dorëheqjen e parevokueshme si kryeministër i vendit dhe si kryetar i LSDM-së.
“Përgëzoj kundërshtarët tanë për fitoren në këto zgjedhje. Unë marr përgjegjësinë për këtë humbje politike, përfshirë edhe rezultatet e këtyre zgjedhjeve. Jap dorëheqjen si kryeministër dhe kryetar i LSDM-së”, tha Zaev.
“Do të qëndroj ende këtu, për aq kohë sa të jetë e nevojshme, për të ndihmuar në riorganizimin e qeverisë së re me një shumicë progresive, e cila ekziston dhe mund të rritet. “Unë si person jam pjesë e LSDM-së dhe mbetem në vijën e parë si anëtar i LSDM-së”, ka shtuar Zaev.
Zaev e ka udhëhequr Maqedoninë e Veriut, që prej vitit 2017, kur e mori mandatin nga VMRO-DPMNE. Ai ishte zotuar se do të dorëhiqej, në rast se LSDM humbiste zgjedhjet lokale, premtim që sapo e ka mbajtur. Ndërkohë VMRO ka shpallur fitoren në Shkup dhe shumë komuna të vendit.
