Një lajm jo i mirë për Romën dhe Shqipërinë. Mbrojtësi Marash Kumbulla ka humbur pjesën e mbetur të sezonit për shkak të një dëmtimi që pësoi në ndeshjen me Andorran që e detyroi të largohej nga grumbullimi për t’u rikthyer në Itali.
Në kontrollet e zhvilluara në mënyrë të detajuar, u konfirmua një dëmtim në meniskun e djathtë për mbrojtësin shqiptar dhe duhen të paktën 3 muaj për t’u rikthyer në fushë.
Në këtë mënyrë në pamundësi për të zbritur sërish në fushë, Kumbulla humbet pjesën e mbetur të sezonit me Romën në Serie A dhe në Europa League e në anën tjetër nuk do të ketë mundësi të grumbullohet as në Qershor për miqësoret që do të zhvillojë Shqipëria ndaj Uellsit dhe Republikës Ceke.
Ky dëmtim mbyll një sezon shumë të pafat për lojtarin shqiptar i cili edhe nuk ka luajtur shumë me Romën, fillimisht për shkak të problemeve të vogla fizike e më pas kur u infektua me Covid duke mbyllur sezonin 2020-2021 me 1593 minuta në fushë dhe 2 gola të realizuar.
