Në tregun e këmbimit valutor të brendshëm, euroja dhe dollari amerikan humbën terren në raport me lekun, gjatë javës 21-26 dhjetor 2020, ndërsa paundi britanik forcoi lehtë pozitat e tij ndaj monedhës vendase. Sipas kursit zyrtar të Bankës së Shqipërisë, euroja regjistroi një zhvlerësim të vazhdueshëm gjatë kësaj jave.
Euroja këmbehej ditën e hënë me 123.46 lekë dhe zbriti në fundjavë në nivelin 122.92 lekë. Dollari amerikan humbi 0.5 lekë gjatë 7 ditëve të fundit, duke zbritur të shtunën në nivelin më e ulët që prej fillimit të këtij viti, në 100.81 lekë.
Ndërsa paundi britanik pas një dobësimi në javën paraardhëse është forcuar në 7 ditët e fundit me 2.69 lekë dhe këmbehet me 137.14 lekë në fundjavë. Sipas Bankës së Shqipërisë, franga zvicerane ka pësuar rënie të kuotës gjatë javës 21-26 dhjetor 2020. Monedha zvicerane këmbehej ditën e hënë me 114.14 lekë ndërsa në fundjavë ka kapur nivelin e 113.46 lekë.
