Drejtuesi i makinës në të cilën humbi jetën tragjikisht 17-vjeçari shqiptar Fabio pritet të dalë sot para gjykatës për të marrë masën e sigurisë. 19-vjeçari, i cili u arrestua pas ngjarjes tragjike nga policia e mbërritur në vendngjarje, përballet me akuzën e vrasjes nga pakujdesia. Sipas mediave greke, shoferi ishte mik i 17-vjeçarit shqiptar i cili kishte ardhur nga Anglia. Gjithashtu bëhet me dije se mjeti i cili u aksidentua ishte në emër të babait të 19-vjeçarit dhe se ai kishte patentë drejtimi.
Aksidenti tragjik ka ndodhur mëngjesin e djeshëm në zonën e Lassit, Argostoli. Pas shkollës, katër miq me origjinë greke dhe shqiptare hipën në makinën e 19-vjeçarit dhe nisën të ecnin drejt aeroportit të ishullit. Por në zonën e Lassi-t në drejtim të Platys Gialos, shoferi 19-vjeçar humbi kontrollin e makinës së tij për një arsye të panjohur, dhe u përplas me shtyllat në trotuar duke bërë që mjeti të përmbysej.
Fatkeqësisht kur makina u përmbys menjëherë mori flakë dhe katër të rinjtë u përpoqën të dilnin sa më parë por 17-vjeçari shqiptar nuk mundi. Ishin kalimtarët ata që njoftuan policinë dhe zjarrfikësit të cilët shuan zjarrin për të nxjerrë trupin e djegur të shqiptarit. Vlen të theksohet se tre pasagjerët e tjerë janë në gjendje të mirë shëndetësore ndërsa vetëm njëri prej tyre ka pësuar lëndime të lehta.
Familja e të riut shqiptar është e shkatërruar pasi nuk mund ta besojnë se një shëtitje e thjeshtë ishte e fundit për djalin e tyre 17-vjeçar. Policia Rrugore e Argostolit ka nisur hetimet paraprake për shkaqet dhe rrethanat e sakta të aksidentit.
