Volejbolli shqiptar ka marrë një lajm të hidhur mbrëmjen e sotme. Ish-trajneri i skuadrave të rrjetës, Ilia Gaxho është ndarë nga jeta. Lajmi konfirmohet nga Federata Shqiptare e Volejbollit, që zbulon se Gaxho vuante nga një sëmundje e rëndë.
“Federata Shqiptare e Volejbollit njofton me dhimbje të thellë ndarjen nga jeta të profesor Ilia Gaxho, i cili vuante nga një sëmundje e rëndë.
“Profesor Ilia Gaxho është një nga personat që gjithë jetën e tij ia dedikoi sportit të volejbollit, gjithnjë pjesë e pandarë e tij, fillimisht në parket dhe më pas në katedrën e volejbollit si dhe pjesë e lëvizjes olimpike.
“Lamtumira e parakohshme e tij lë pas një boshllëk të madh për familjen, kolegët, komunitetin e volejbollit dhe cilindo tjetër që e ka njohur.
“Ilia Gaxho është një nga flamurtarët e sportit të volejbollit, themelues i tij në qytetin e Krujës e më pas puna e tij u shtri në të gjithë vendin.”-thuhet në njoftimin e FSHV.
