Flamurtari ndalet në Fushë-Krujë, Iliria fiton 2-1 dhe merr kreun e Kategorisë së Parë

Iliria ka mposhtur Flamurtarin me rezultatin 2-1 në Fushë-Krujë, në ndeshjen përmbyllëse të javës së 8-të të Kategorisë së Parë. Fitorja i jep skuadrës vendase mundësinë të ngjitet në krye të klasifikimit, ndërsa vlonjatët ndërpresin serinë prej tri fitoresh radhazi.

Përballja ishte e luftuar nga të dyja skuadrat, por pjesa e parë u mbyll me avantazhin 1-0 për Ilirinë. Adolf Selmani ishte autori i golit që i dha epërsinë ekipit të tij.

Emocionet më të forta u rezervuan për minutat e fundit të takimit. Iliria gjeti edhe golin e dytë, sërish me Adolf Selmanin, i cili realizoi dopietën personale. Flamurtari reagoi shpejt dhe arriti të shkurtojë diferencën me Korreshin, duke e çuar rezultatin në 2-1.

Megjithatë, vlonjatët nuk arritën të shmangnin humbjen, me Ilirinë që festoi tri pikë të rëndësishme në shtëpi.

Pas javës së 8-të, Iliria ngjitet në kuotën e 15 pikëve, ndërsa Flamurtari mbetet me 12 pikë, pas një ndalese që i kushton në garën për kreun e renditjes.