Tiranë-Durrës/ Makina përfundon në kanal pranë Urës së Dajlanit, shoferi dyshohet se ishte i dehur.

Një automjet ka përfunduar në kanal në autostradën Tiranë-Durrës, në afërsi të Urës së Dajlanit, pasi drejtuesi i tij dyshohet se po tentonte t’i shmangej Policisë Rrugore.

Sipas informacioneve paraprake, drejtuesi i automjetit nuk i është bindur urdhrit të policisë për të ndaluar, duke bërë që shërbimet policore të nisin ndjekjen e tij. Gjatë ndjekjes, makina ka dalë nga rruga dhe ka përfunduar në kanal.

Në vendngjarje kanë mbërritur shërbimet zjarrfikëse, të cilat kanë ndërhyrë për nxjerrjen e drejtuesit nga automjeti. Ai është transportuar më pas në spital për të marrë ndihmën mjekësore.

Paraprakisht, dyshohet se drejtuesi i mjetit ishte në gjendje të dehur. Autoritetet po vijojnë verifikimet për të sqaruar rrethanat e plota të ngjarjes.