Vrasja e shqiptarit në Itali/ 29-vjeçari pranon krimin: “Isha unë”, dyshohet për një borxh 500 euro
Detaje të reja janë zbardhur nga vrasja e 31-vjeçarit shqiptar, Denaldo Maxhallaku, trupi i të cilit u gjet i pajetë në një pus në zonën e Longianos, në provincën e Çezenës, Itali.
Për ngjarjen është ndaluar një 29-vjeçar italian, i dyshuar si autor i vrasjes dhe i fshehjes së trupit. Sipas mediave italiane, gjatë marrjes në pyetje, ai ka pranuar përgjegjësinë për krimin, duke deklaruar: “Isha unë”.
Nga hetimet paraprake dyshohet se motivi i ngjarjes mund të ketë qenë një borxh prej rreth 500 eurosh, i lidhur me furnizimin me lëndë narkotike. Sipas rindërtimit paraprak të ngjarjes, konflikti mes dy personave dyshohet se ka përfunduar në mënyrë fatale.
Ndërkohë, krahas hetimeve për zbardhjen e plotë të rrethanave, bashkëshortja e viktimës ka rrëfyer dhimbjen e madhe për humbjen e tij.
Ajo tregon se Denaldo ishte larguar nga banesa më 8 tetor, duke i thënë se do të shkonte në një lokal dhe do të kthehej në mbrëmje. Por ai nuk u kthye më në shtëpi.
“Ishte një bashkëshort i pranishëm, një baba i kujdesshëm, e donte shumë vajzën tonë vetëm një vjeçe. Ishte një punëtor i jashtëzakonshëm”, është shprehur bashkëshortja e tij.
Hetimet nga autoritetet italiane vijojnë për të sqaruar plotësisht dinamikën e krimit dhe rrethanat që çuan në vdekjen e 31-vjeçarit shqiptar.
