“Do të hiqja dorë nga gjithçka për të folur me të”/ Mick Schumacher rrëfen dhimbjen për të atin, 13 vite pas aksidentit

Mick Schumacher ka ndarë një rrëfim prekës për mungesën e të atit, legjendës së Formula 1, Michael Schumacher, duke zbuluar se sa shumë do të dëshironte të fliste me të sot, kur edhe vetë ka ndërtuar karrierën e tij në botën e automobilizmit.

Në një dokumentar të Netflix, Mick flet për dhimbjen që vazhdon të ndiejë që prej aksidentit të rëndë të skive, të pësuar nga Michael Schumacher më 29 dhjetor 2013, në Méribel të Francës. Në atë kohë, Mick ishte vetëm 14 vjeç.

“Do të kishim kaq shumë për të folur, sepse flasim të njëjtën gjuhë: gjuhën e automobilizmit”, rrëfen ai me emocion.

Sipas Mick, fakti që tashmë është vetë pilot profesionist e bën edhe më të fortë dëshirën për të ndarë me të atin përvojat, vështirësitë dhe emocionet e karrierës së tij.

“Mendoj se sot unë dhe babi do ta kuptonim njëri-tjetrin ndryshe, thjesht sepse flasim të njëjtën gjuhë: gjuhën e automobilave. Do të kishim kaq shumë për të folur. Do të hiqja dorë nga gjithçka vetëm për të pasur mundësinë të flisja sërish me të”, shprehet Mick.

“Është paksa e padrejtë”, dhimbja që mbetet

Për pilotin e ri, një nga aspektet më të vështira është mungesa e momenteve që shumë fëmijë vazhdojnë t’i ndajnë me prindërit e tyre.

“Pas aksidentit, nuk ekzistojnë më ato momente që shumë njerëz të tjerë i ndajnë me prindërit e tyre. Mendoj se kjo është paksa e padrejtë”, thotë ai.

Megjithatë, kujtimet e fëmijërisë mbeten një burim ngushëllimi. Mick kujton kohët kur familja kalonte momente së bashku, udhëtimet, garat me kart dhe aktivitetet e përbashkëta me prindërit dhe motrën, Gina-Maria.

“Kur mendoj për të kaluarën, më kujtohet kryesisht se si argëtoheshim të katërt së bashku. Më kujtohet kur ngisnim kart nëpër fshat, kur hipnim mbi kuaj dhe kalonim kohë së bashku. Këto janë kujtimet që më bëjnë të lumtur”, rrëfen ai.

Corinna Schumacher: “Kur e dëgjoj këngën tonë, qaj nga brenda”

Në dokumentar ka folur edhe Corinna Schumacher, bashkëshortja e Michael, e cila ka kujtuar lidhjen e veçantë me të shoqin dhe rëndësinë e momenteve që kanë ndarë ndër vite.

Ajo tregon se Michael e kishte gjithmonë të rëndësishme të ruante një kufi të qartë mes jetës private dhe asaj publike. Këtë parim familja e ka respektuar edhe pas aksidentit, duke mbajtur larg vëmendjes së publikut detajet mbi gjendjen e tij shëndetësore.

Mes kujtimeve më të veçanta të çiftit është kënga “Rush Rush” e këngëtares Paula Abdul, e cila ka një domethënie të veçantë për ta.

“Ajo ishte kënga jonë në atë kohë. Kur e dëgjoj sot në makinë, qaj nga brenda”, rrëfen Corinna.

Mick ndoqi gjurmët e legjendës së Formula 1

Mick Schumacher zgjodhi të ndiqte rrugën e të atit, duke u afirmuar në garat automobilistike. Në vitin 2018, ai fitoi titullin e kampionit evropian në Formula 3, ndërsa në vitin 2020 u shpall kampion i Formula 2.

Më pas, ai garoi për dy sezone në Formula 1 me ekipin Haas dhe mori rolin e pilotit rezervë te Mercedes. Në vitet 2024 dhe 2025, mori pjesë në Kampionatin Botëror të Qëndrueshmërisë me Alpine.

Pavarësisht arritjeve sportive, për Mick mbetet një dëshirë që asnjë trofe nuk mund ta zëvendësojë: të ulej edhe një herë përballë të atit dhe të ndante me të gjithçka që ka përjetuar në botën e automobilizmit.

Një bisedë e munguar, që për të do të kishte më shumë vlerë se çdo sukses në pistë.