Lehtësohen procedurat për certifikimin e strukturave të agroturizmit.
Ministrja e Bujqësisë dhe Zhvillimit Rural Frida Krifca tha pas përfundimit të mbledhjes së Këshillit të Ministrave së bashku me Ministrinë e Turizmit dhe Mjedisit kanë propozuar ndryshimet ligjore për lehtësimin e kritereve për tu certifikuar dhe për të përfituar lehtësitë fiskale.
Krifca theksoi se me këto ndryshime i përgjigjemi kërkesave të më shumë se 300 operatorëve në të gjithë vendin si edhe zhvillojmë akoma më shumë një sektor i cili ka një shifër të ardhurash prej më shumë se 80 milionë dollarë vetëm për vitin 2022 (shifra nga infromacionet mbi turizmin).
Sipas saj ndryshimet e miratuara sot zgjerojnë fashën e aktiviteteve tregtare që do të ushtrojnë veprimtarinë e agroturizmit, si për madhësinë e biznesit ashtu dhe llojin e veprimtarive agorturistike.
“Kështu përfshijmë në njësitë agroturistike ato ferma të cilat kanë si aktivitete: Përpunimin e produkteve bujqësore dhe të paktën 1 ha tokë të mbjellë me kultura bujqësore; Përpunimin e produkteve blegtorale dhe të mbarështojnë të paktën 10 krerë gjedhë ose 100 krerë dele ose dhi ose 200 krerë shpendë; Akuakulturën për subjekte që kanë në pronësi ose përdorim – sipërfaqe ujore jo më të vogël se 3000 m2, që përdoret si për kultivimin e peshkut ashtu edhe të midhjes; Bletërritjen dhe prodhimin e mjaltit me të paktën 50 zgjoje bletësh dhe parkun e bletëve”, tha Krifca.
Ministrja informoi se, për ta bërë më të lehtë certifikimin dhe për pasojë lehtësitë fiskale që vijnë bashkë me të, kemi ulur numrin e shtretërve minimalisht të nevojshëm në 6 dhe numrin e vendeve në restorant në 10 vende.
“Kemi shkuar dhe më tej duke lehtësuar kushtet edhe për certifikimin e bujtinave apo njësive relativisht të vogla, por që përmbajnë vetë identitein tonë rural. Me vendimin e ri të këshillit të ministrave, me certifikatë agroturizmi do të mund të pajisen edhe fermat me 1 ha tokë, fermat blegtorale me 5 krerë gjedh, 50 krerë të imta dhe 100 shpendë apo ferma bletësh me 30 koshere”, tha ministrja.
“Qëllimi kryesor i këtyre ndryshimeve është të mbështesim të rinjtë pikërisht në zonat rurale për ta kthyer jetesën e tyre atje në sipërmarrje e cila sjell të ardhura dhe njëkohësisht prezanton bukurinë dhe pasurinë kulinare, kulturore dhe historike të vendit tonë”, deklaroi Krifca.
