Pas shumë vitesh heshtjeje më së fundi një autoritet zyrtar shtetëror ka denoncuar agjencitë që abuzojnë me pasagjerët shqiptar që zgjedhin të udhëtojnë me linjat ajrore.
Fjala është për klasifikimin e katër kompanive që kryejnë transportin me avion të udhëtarëve, përkatësisht “Fly Ernest”,”Blu Panorama”, “Albawings” dhe “Adria”.
Institucioni denoncues i moskorrektësisë së shërbimit të ofruar nga këto të fundit është Autoriteti i Aviacionit Civil, i cili ka publikuar listën nominale të shoqërive ajrore, të cilat kanë bërë më shumë vonesa dhe anullime, duke i lënë pasagjerët të presin në aeroport.
Raporti bën fjalë për vitin 2018, gjatë të cilit kompania me numrin më të lartë të vonesave rezulton të jetë “Fly Ernest”, e cila regjistron më shumë se shtatëdhjetë e dy vonesa më shumë se dy orëshe dhe katërmbëdhjetë fluturime të anulluara.
Në vendin e dytë të listëts renditet “Blu Panorama”, që rezulton të ketë bërë shtatëdhjetë e një vonesa mbi dy orëshe, ndërkohë që ka anulluar gjashtë fluturime të planifikuara.
Në vendin e tretë renditete “Albawings” me tridhjetë e shtatë vonesa mbi dy orëshe, dhe në të katërtin “Adria” me tetë vonesa.
Ligjet në fuqi u japin të drejtë pasagjerëve, që në rast vonesash apo anulimi të fluturimeve, të përfitojnë kompesim deri në 250 euro nga shoqëritë ajrore. Nga të dhënat zyrtare rezulton se, për vitin e kaluar kompanitë ajrore kanë pranuar 1.200 kërkesa për kompesim, e deri tani kanë realizuar 700 të tilla.
Sipas Autoritetit të Aviacionit Civil, “Blue Panorama”, pavarësisht problemeve me vonesat e shumta, me pesëqind pasagjerët e kompensuar rezulton të jetë kompania më korrekte për pagesën e këtij detyrimi. Ndërkohë “Fly Ernest”, e renditur si problematike për vonesat e anullimit e fluturimeve, ka kompensuar vetëm nëntëdhjetë e gjashtë pasagjerë.
