Arsenali mposht 5-4 në ruletën e penalltive Liverpoolin dhe bëhet skuadra e dytë me më shumë trofe të Superkupës së Anglisë (16) pas Manchester United (21). Në përballjen e të ashtuquajturës Community Shield, të luajtur në mitikun Wembley, koha e rregullt përfundoi 1-1, ndërsa në goditjet e 11-metërshave, i vetmi që gaboi nga 10 gjuajtje gjithsej ishte Brewster i Liverpoolit në serinë e tretë të penalltive.
Liverpooli e tundi fillimisht rrjetën që në minutën e 7-të me van Dijk, pas një goditjeje standarde, por goli u anulua me të drejtë nga sistemi VAR për pozicion jashtë loje të holandezit. Pesë minuta më vonë, Pierre-Emerick Aubameyang shënoi një gol shumë të bukur me një diagonale që rezultoi e pakapshme për portierin e Liverpoolit, duke u dhënë epërsinë “topçinjve”.
Goli i barazimit të Liverpoolit erdhi në minutën e 73-të me Minaminon, por rezultoi i pavlerë pas goditjeve të 11-metërshave. Për Arsenalin u treguan të saktë të pesë të përzgjedhurit e parë të Artetas: Nelson, Maitland-Niles, Soares, Davild Luiz dhe në fund Aubameyang. Një start premtues i sezonit për Arsenalin, që nën drejtimin e Artetas siguroi trofenë e dytë brenda një muaji (FA Cup dhe Community Shield).
