Poli cia në Utah të SHBA-ve, ka ndalur një pesëvjeçar i cili me veturën e prindërve po shëtitej nëpër autostradë. Djaloshi i tha policëve se është rrugës për në Kaliforni, ku synon t’i blejë vetes një Lamborghini, me tre dollarët e vetëm që i kishte në xhep.
Policët në Ogden pranë Salt Lake City, në fillim menduan se veturën po e nget ndonjë person me nevoja të veçanta. Por kur e gjetën djaloshin duke vozitur, ai u tha policëve se ishte larguar nga shtëpia pas një grindje, ku e ëma kishte refuzuar t’ia blejë veturën sportive luksoze.
“Kishte vendosur ta marrë veturën dhe të shkoj i vetëm në Kaliforni për ta blerë një veturë. Ka mundur të befasohet, sepse në xhep kishte vetëm tre dollarë”, ka shkruar në Twitter policia, transmeton Telegrafi. Ky djalë i vogël mezi po arrinte të shikonte përmes xhamit të përparmë, kurse autoritetet nuk e kanë zbuluar identitetin e familjes së vogëlushit, por ka postuar fotografinë e tij prapa timonit por me fytyrë të mbuluar. Një radio lokale KSL ka njoftuar se djaloshi kishte arritur t’i përshkoj rreth pesë kilometra, para se të ndalej dikur kah ora 11 të paradites të hënë.
