Masë paraburgimi prej 30 ditësh u është caktuar ish-ministrit të Transportit dhe Telekomunikacioneve, Mile Janakieski dhe ish-sekretarit të përgjithshëm të qeverisë, Kirill Bozhinovski, njoftoi sot Gjykata maqedonase e Shkallës së Parë.
“Këshilli Penal i Sektorit për krim të organizuar dhe korrupsion në kuadër të kësaj gjykate, duke vepruar për propozimin e Prokurorisë Publike për përndjekjen e veprave penale, të cilat lidhen dhe të cilat dalin nga ndjekja joligjore e komunikimeve për përcaktimin e masave për sigurimin e pranisë kundër M.J. dhe K.B. të përfshirë në lëndën e prokurorisë të quajtur si ‘Titanik’, pas vlerësimit të fakteve dhe dëshmive për propozimin solli vendime me të cilat e pranoi propozimin dhe dy personave u përcaktoi masë paraburgimi në kohëzgjatje prej 30 ditësh sipas nenit 165 paragrafi 1 pika 1 të Kodit të Procedurës Penale”, thuhet në njoftim.
Janakieski dhe Bozhinovski janë ndaluar dhe dërguar sot në burgun e Shutkës.
Ndalimi i tyre pason pas arratisjes së ish-kryeministrit, Nikolla Gruevski në Hungari ku kërkoi azil politik.
