Taskforca për zbatimin e masave kundër COVID ka vijuar punën në terren me masa të shtuara, duke kryer vetëm në 24 orët e fundit mbi 1400 inspektime dhe monitorime, ku janë marrë 3 masa administrative për pezullim aktiviteti në subjekte. Ministria e Shëndetësisë dhe Mbrojtjes Sociale informoi se në total, gjatë periudhës së pandemisë, janë kryer mbi 144 mijë inspektime dhe monitorime dhe janë marrë 560 masa administrative me gjobë dhe pezullime aktiviteti për subjekte të gjetura në shkelje të protokolleve dhe rregullave për parandalimin e SARSCOV2.
Ministria e Shëndetësisë u kërkon bizneseve të zbatojnë me korrektësi protokollet e sigurisë në punë dhe qytetarët të tregohen të kujdesshëm, duke respektuar distancimin social, masat e higjenës dhe vendimin për maskën e detyrueshme në ambientet e mbyllura. “Çdo shkelje do të konsiderohet me rrezik për shëndetin e qytetarëve dhe si e tillë do të ndëshkohet sipas ligjeve në fuqi” apelon ndër të tjera Ministria e Shëndetësisë.
