Një ngjarje e rëndë është zbuluar së fundmi në Greqi pasi një 28-vjeçare rome greke është rrëmbyer dhe shfrytëzuar seksualisht nga një 28-vjeçar shqiptar. Sipas mediave greke gjithçka ka ndodhur kur 28-vjeçari i është afruar të resë përmes Facebook dhe i ka ofruar të punonte si kamariere në një kafene. Vajza e pranoi propozimin dhe kështu nisi e gjithë ngjarja. Shqiptari u takua me vajzën dhe pasi i tha se kishte ndërmend ta ndihmonte për të dalë nga situata e vështirë në të cilën ndodhej, më pas, duke përfituar nga pozita e saj e pambrojtur, e çoi në një apartament në Athinë ku qëndronte në mënyrë të paligjshme.
Më pas ai e detyroi me forcë që të punonte në një bordello, duke i mbajtur të gjitha të ardhurat. Por jo vetëm kaq pasi policia ka zbuluar se e reja ka patur shumë plagë në trup të shkaktuara nga goditjet e forta me zinxhirë dhe gjendja e vajzës ishte e mjerueshme. Në lidhje me këtë rast janë arrestuar dhe akuzuar dy persona të tjerë, një 40-vjeçar dhe një 61-vjeçar. Ky i fundit është personi që i kishte dhënë banesën në të cilën ishte mbajtur me forcë vajza ndërsa mësohet se për transportin e saj kishte siguruar edhe një makinë në pronësi të tij. Nga ana tjetër, 40-vjeçari është punonjës në një lokal ku punonte vajza, por mohon se e dinte saktësisht se çfarë po ndodhte.
Vlen të theksohet se 28-vjeçari shqiptar i arrestuar është një i njohur i Autoriteteve pasi në të kaluarën ka qenë i përfshirë edhe në krime të tjera. Mësohet se 28-vjeçari kishte qëlluar në drejtim të një personi në Pire në vitin 2020 dhe ishte arratisur nga vendi.
