Edhe pse nuk lejohet që të takojnë të afërmit e tyre, dhjetra familjarë qendrojnë në dyert e spitaleve Covid, në pritje që të marrin një lajm prej të afërmve të tyre. Situata më serioze paraqitet në spitalin e “Shefqet Ndroqit”, ku dy persona të prekur me Covid 19 i kanë dhënë fund jetës duke u hedhur nga katet e larta të spitalit, pasi duket të kenë shfaqur shenja të depresionit. Gazetarja e Fax News Fjona Çela ka zhvilluar intervista me disa prej familjarëve që ndodhen në dyert e spitalit, të cilët duken se janë të kënaqur me shërbimin që derimë tani u është bërë të afërmve të tyre.
Ata thonë se nuk kanë paguar asnjë lloj çmimi për stafin mjekësor apo për trajtimin e tyre, dhe thonë se shërbimi që kanë marrë është shumë i mirë. Sa i takon dhënies fund të jetës së 65-vjeçarit mbrëmjen e djeshme, qytetarët shprehen se ai kishte kaluar në depresion në momentin kur ka mësuar se ishte infektuar me Covid. Sipas tyre mjekët u japin kurajo pacientëve të shtruar dhe u qendrojnë te koka. “Edhe mjeku vetë më ka çuar mesazh dhe më ka thënë që mos sillni më ushqime, se është bërë këtu magazinë. Është gjynah i Zotit që tiu bjemë në qafë mjekëve, se dhe ata janë vetë të rrezikuar”, shprehet qytetari që ka vëllanë e tij të shtruar në spitalin Shefqet Ndroqi.
