Prej 43 vitesh bën të njëjtin profesion me plot pasion. E tillë është historia e argjendarit më të njohur në qytetin e Vlorës. Bexhet Rrapin. Artizanin e gjen çdo ditë duke punuar në punishten e tij të vogël në lagjen “Albano Dhe Romina”.
“Për një kohë të gjatë kam qenë unë. Tani janë 4. Jam veterani i Vlorës që punoj akoma. Është një pasion, sa më shumë ikin vitet aq më shumë lidhem me të”, thotë ai. 63 vjeçari tregon se i pëlqen punimet me simbole, si medaljoni i shqiponjës.
“Kemi bërë shqiponjën në flori, nga një shqiptare e larguar. Kam bërë kryqin. Byzylyk me emrat e tyre. Më ndihmoi shkolla e axhuterisë. Aplikova dhe dola fitues. Bëheshin punime në flori dhe argjend. Atë kohë bëheshin punime të vështira me derdhje, me stampime. Riparime të ndryshme. Bënim punime me materialet e klientit se shteti nuk na lejonte të punonim privatisht. Nëse bëheshin punime dhe klienti shënohej me karat të lartë. Bëheshin menjëherë verifikime. Personi që kishte sjellë porosinë verifikohej. Nuk kishte dyqan për tregti.”, thekson Bexheti për Abcnews.
Gjatë punës së tij ka pasur edhe situata të sikletshme dhe të vështira. Rrapi tregon se ka pasur raste që i është dashur të ndihmojë klientët të heqin nga gishti unazat.
“Kemi pasur raste shumë të vështira që ndodhin nga heqja e unazës nga gishti. Është dashur ndërhyrja jonë. Ka qenë një ditë e vështirë që njërit i është hequr unaza me gurë freksibël dhe ujë. Unazat janë shumë të vështira për t’i hequr”, thekson ai.
Mes të tjerash Bexheti i bën thirrje të rinjve që të mos i neglizhojnë këto lloj zanatesh.
