Ish-Presidenti Ilir Meta, nga selia e LSI-së ka folur për hapat e mëtejshëm të tij, në kuadër të angazhimit në opozitë.
Në një prononcim për mediat, Meta tha se ka ardhur momenti i ndryshimit të sistemit në vend. Sipas tij, populli i 2 marsit do të nisë rrugën e tij dhe të shumëfishohet ditë pas dite, një mesazh ky që duket se paralajmëron protesta.
“Erdha këtu për të treguar jo vetëm se jam krenar për forcën që krijova. Jo vetëm i dha vendit stabilitet dhe liberalizimin e vizave falë koalicionit të vitit 2009 me PD. Ka meritat e saj për marrjen e statusit kandidat.
Ka bërë çdo gjë LSI-ja për të përshpejtuar integrimin europian të vendit.
Por ky nuk ishte vullneti, jo vetëm i lidershipit të PS-së, por edhe lidershipit të korruptuar dhe të kapur prej kohëssh të PD-së që programuan djegien e mandateve. Këtë nuk mund ta bënin pa futur në grackë LSI-në e cila doli jashtë funksionit të saj duke u bërë shtojcë e pavetëdijshme e një shtojce të vetëdijshme e qeverisë, PD-ja e Lulzim Bashës.
Jam këtu për të falenderuar të gjithë anëtarët e LSI-së për sakrificat e tyre. Kemi një ndryshim të rrethanave historike.
Nuk është më një forcë politike që mund të ndryshojë fatet e vendit, siç ishte misioni i LSI-së, për të qenë një forcë për të zhbllokuar ngërçet. Ka ardhur momenti për ndryshimin e sistemit në vend. Ka ardhur momenti që populli i 2 marsit, të nisi rrugën e tij, të shumëfishohet ditë pas dite.
Do të triumfojë referendumi si e vetmja mënyrë që të vendosë nën kontroll një klasë të përgjegjshme. Kjo gjë do të ndodhë shumë shpejt. Jam i bindur që referendumi që i ka munguar Shqipërisë nga viti 98’, referendumi do të jetë shpata” – tha Meta.
