Klinikat dentare do të hapen nga data 11 Maj, megjithatë përmes një protokolli masash higjieno-sanitare, Instituti i Shëndetit Publik rekomandon që t’i drejtoheni atyre vetëm për vizita urgjente dhe jo për kontrolle rutinë. Në protokoll thuhet se të gjithë personat e punësuar apo klientët duhen kontrolluar për shenja të dukshme të koronavirusit. Theksi vihet në ruajtjen e masave të sigurisë, higjienës dhe distancimit social. Të gjithë personat që i drejtohen subjekteve dentare duhet të komunikojnë më parë me punonjësit e saj.
Pacientët duhet të marrin rekomandime përmes telefonit përpara se të shkojnë në klinikë. Ata duhet të udhëzohen për kujdesin ndaj dhëmbëve dhe marrjen e medikamenteve në shtëpi kur vizita në klinikë nuk bëhet në kohë. Nuk lejohet që pacientët jenë të shoqëruar me përjashtim të fëmijëve që paraqiten bashkë me prindërit.
