Një peshkatar peruan, Máximo Napa Castro, u shpëtua pas 95 ditësh i humbur në det. Ai u gjet nga një patrullë ekuadoriane 1,126 kilometra larg bregut të Perusë, pas më shumë se tre muajsh duke lundruar pa ujë të pijshëm dhe duke u ushqyer me çfarë i ofronte oqeani.
Napa Castro, i njohur si “Gatón”, tha për CNN se besimi në Zot dhe dëshira për të parë familjen e tij e mbajtën gjallë. Ai mbijetoi duke ngrënë peshq, zogj, insekte dhe madje edhe një breshkë për të pirë gjakun e saj. “I fola Zotit për shumë ditë, i tregova se sa e rëndësishme ishte familja ime”, u shpreh ai.
Peshkatari kishte nisur udhëtimin e tij më 10 dhjetor nga Marcona, Peru, por një defekt në motor dhe rrymat e forta e larguan nga bregu. Pa radio dhe asnjë mjet komunikimi, ai mbeti i izoluar në oqean. Në një moment, ai humbi shpresën dhe mendoi të dorëzohej, por u vetë-motivua duke i thënë vetes: “Ti mundesh, Gatón!”.
Për shkak të ekspozimit të vazhdueshëm në diell dhe ujërat e kripura, trupi i tij u mbush me plagë. Pinte ujë shiu kur kishte mundësi, ndërsa në rastet e tjera ishte i detyruar të pinte urinën e tij. “Ishte e tmerrshme, por nuk kisha zgjidhje tjetër”, rrëfeu ai.
Më 14 mars, ai dëgjoi një zë nga një helikopter shpëtimi që thërriste: “Gatón!”. Ishte momenti kur e kuptoi se kishte shpëtuar. Pas 95 ditësh ankthi dhe mbijetese, ai e sheh jetën me një kuptim të ri. “Dua ta tregoj historinë time në gjithë botën, që njerëzit të besojnë dhe të japin më shumë dashuri në këtë jetë”, përfundoi ai
