Është vënë nën hetim mjeku Gentian Alla pas vdekjes së 3-vjeçares në qytetin e Elbasanit. Akuza që rëndon ndaj mjekut roje në Pediatrinë e Elbasanit është “Neglizhenca në trajtimin mjekësor”.Ditën e djeshme babai i 3-vjeçares deklaroi se vajza e tij ka qenë e sëmurë prej 8-9 ditësh dhe se kur e kanë sjellë në spital mjekët i kanë treguar se kishte virozë dhe i kanë dhënë ilaçe dhe e kanë nisur për në shtëpi.
Njoftimi i policisë: Nga specialistët për Hetimin e Krimit në Komisariatin e Policisë Elbasan u procedua penalisht për veprën penale “Neglizhenca në trajtimin mjekësor”, shtetasi G. A., 47 vjeç, banues në Elbasan, me detyrë mjek në Spitalin Rajonal Elbasan, pasi ditën e djeshme është dërguar në spital, në gjendje të rëndë për jetën, një shtetase e mitur 3 vjeçe, e cila pas disa orësh dyshohet se ka ndërruar jetë për shkak të neglizhencës në trajtimin mjekësor.
