Dy fëmijët e familjes Ymeri në Tiranë, të moshës 8 dhe 6 vjeç janë të privuar për të shkuar në shkollë edhe pse arsimi 9 vjeçar është i detyrueshëm. Nëna e tyre Fatjona thotë se nuk mund të arsimojë fëmijët për shkak të pamundësisë financiare. “Është shumë e vështirë. Vetë jam pa shkollë, thashë të kem fëmijët por nuk mu plotësua dëshira se duan kushte, rrobat, libra, çanta.”
Thotë se të ardhura sigurojnë vetëm nga mbledhja e kanaçeve. “Nga shteti asnjë lek, vetëm burri del për hekura. Duhet me shit kanaçet që të marrë bukë.” Ndihmesë për të shpesh herë bëhet nëna. “Njëherë mbeti 8 ditë pa punë dhe u futa borxh në dyqane. Kam akoma borxhe por shyqyr që kam mamin afër, më ndihmon kur nuk punon burri.”
Prej vitesh jeton në një barake sa për të futur kokën. “Gjithë barakja pikon nga fundi në fund. Kam pasur dhe krevatin e madh këtu, e nxora se pikon. Jam vetë e gjashtë që fle këtu. Shumë e vështirë se nuk kam dhe kushtet.”
