Para pak ditësh një ngjarje e rëndë ndodhi në Durrës, për shkak të ngricave në rrugë. Një autoambulancë po transportonte një paciente 71-vjeçare kur doli nga rruga dhe u përplas me murin ndarës, duke shkaktuar vdekjen e menjëhershme të të moshuarës. Gjatë një emisioni televiziv, djali i viktimës tha se nëna e tij nuk vuante nga Covid-19 ashtu siç u raportua në media, por vuante prej veshkave dhe kishte nevojë për dalizë.
Nëna ime nuk ka patur probleme me Covid-19. Më ka vrarë familjarisht, moralisht. Kanë thënë se ka qenë me Covid, por kjo nuk ka qenë shkaku i vdekjes së nënës sime. Nëna ime ka patur nevojë për dializë, prandaj u nis nga Saranda në Tiranë. Kaloi një vdekje klinike, e në Gjirokastër u soll në jetë sërish. Spitali i Gjirokastrës më tha se e kishte të pamundur, duhej që ta nisnin urgjentisht në Tiranë.
Sipas tij, nëna ka ndërruar jetë si pasojë e aksidentit. Ai shtoi se ka qenë në vendin e ngjarjes dhe ka parë se si ishte bërë aksidenti.
Është goditur disa herë makina me ndarësen e rrugës. Është rrotulluar makina dhe është goditur me anën e pasme dhe është përmbysur dhe ka ikur zvarrë. Nëna deri në ato momente ka qenë mirë, ishte përmirësuar. Që në Gjirokastër ishte bërë më mirë, e përballonte rrugën për në Tiranë. Nuk ka diskutim, vetëm aksidenti i mori jetën nënës. Nëna edhe pasi bëri aksidentin, edhe 2-3 minuta pas ka qenë gjallë. Por aty dha shpirt pastaj. Që nga Shkozeti i Durrësit e deri në Tiranë, kishte probleme me ngricën. Nisësh për t’i bërë mirë dikujt, por i merr jetën. Shpejtësia ka qenë mbi 115 km, ka kufizime edhe me shpejtësinë.
