Ditën e sotme pas mbledhjes së Kryesisë së Partisë Socialiste, kryeministri Edi Rama bëri me dije se do të jetë ai ministër i Jashtëm i vendit, deri në përballjen që do të ketë me presidentin Ilir Meta në Gjykatën Kushtetuese, i fundit ky pasi nuk pranoi shkarkimin e Ditmir Bushatit, për të emëruar më pas Gent Cakajn.

Kryeministri Edi Rama çoi sot në Presidencë dy kërkesa për dekret, atë të emërimit të tij Ministër i Jashtëm dhe shkarkimin e Bushatit.

Pas kësaj Instituti i Studimeve Politike ka publikuar të gjitha rastet, që nga viti 1912 dhe deri më sot, ku kryeministri ka mbajtur edhe një post ministri.

Postimi i plotë i Institutit të Studimeve Politike:

“Kryeministri edhe ministër i jashtëm? Një model “grek“ emergjent për Shqipërinë? Në fakt në traditën tonë shtetërore ka pasur edhe raste të tjera kur kryeministri ka ushtruar edhe postin e Ministrit të jashtëm. Tabela e hartuar nga Instituti i Studimeve Politike (ISP) paraqet rastet në 107 vjet, por në tërësi, kanë qenë kabinete në situata të jashtëzakonshme (1912, 1914, 1921, 1944) apo për periudha shumë të shkurtra kohore. Përjashtim bën periudha 1946-1953 kur kryeministri mbante të gjitha postet e rëndësishme në parti, shtet dhe në qeveri, – një tipar i partive shtet. Në rastet e tjera jetëgjatësia e këtij eksperimenti ka qenë me disa muaj. I tillë mund e duhet të jetë edhe tani.
Shqipëria e sotme nuk është në asnjë prej krizave politike të viteve të eksperimentimeve politike dhe as në situatë të jashtëzakonshme. Ne kemi parlament, kemi qeveri, kemi president, kemi parti, kemi opozitë, por pavarësisht institucioneve kushtetuese e legjitime ne vijojmë të kemi konflikte të personalizuara, të cilat zëvendësojnë institucionet dhe kështu, krijojnë kosto, të cilën e paguajnë vetë institucionet, shteti dhe shoqëria.”