Identifikohen emrat e dy të rinjve që u qëlluan sot me armë zjarri në Laprakë, ku për pasojë humbi jetën 17-vjeçarja.
Përmes një njoftimi për mediat, policia tha se Briselda Gjikola ka ndërruar jetë në spital, ndërsa 23-vjeçari Erion Bengo ndodhet në gjendje të rëndë.
Mësohet se dy të rinjtë kanë qenë në një makinë kur kanë rënë pre e një atentati, pasi ndaj tyre është qëlluar me breshëri plumbash.
Mediat raportojnë se makina ku ishin dy të rinjtë ishte e ndaluar.
Pak pas ngjarjes, një autoambulancë i ka dërguar dy të rinjtë në spital, ku vajza ishte ende në gjendje vitale. Ndërkohë, aktualisht i riu ndodhet në koma.
Policia e ka pasur të vështirë si fillim të identifikojë dy të rinjtë, pasi ata u paraqitën në spital pa mjete identifikimi.
Sipas ‘News24’, djali dhe vajza kishin marrë edhe plumba në fytyrë, duke e bërë edhe më të vështirë identifikimin e tyre.
