Nik Xhelilaj prej kohësh po qëndron larg vëmendjes mediatike dhe duket se ai e ka bërë vetë këtë zgjedhje. Së fundmi aktori shqiptar ka qenë i ftuar në emisionin radiofonik “Pardon my french” në Top Albania Radio dhe iu ka kërkuar falje të gjithë atyre që nuk ju është përgjigjur këto kohë.
Gjatë intervistës, Niku ka treguar shumë detaje rreth jetës së tij, që nuk i kemi ditur më parë dhe sigurisht karrierës si aktor. Ai zbuloi se në moshën 14-vjeçare ka bërë një shkollë ushtarake në Turqi, me detyrim nga prindërit, por ai nuk e vazhdoi dhe vndosi të arratisej prej saj. Aktori tregoi se kjo gjë i kushtoi “shtrenjtë”, pasi i ati nuk i ka folur për 6 muaj me radhë.
“Kam qenë 14 vjeç kur shkova në Turqi, kujtoja se kishte qenë ideja vetëm e babit që të shkoja atje, por tani në pandemi kur isha në Shqipëri në mars, para se të ikja më thotë mami “jo jo… unë aplikova emrin tënd…” edhe që të më vinte nga mami kjo surprizë nuk e dija, paska qenë mami fajtore…
Në ato vite më kujtohet rruga që bëja nga Pallati Kulturës deri në Stamboll me autobus dhe në ’97-98 unë e lashë shkollën, vetëm 4 muaj qëndrova dhe u arratisa, e kisha të vështirë se isha i vetmi që vija nga Tirana. Nja 6 muaj nuk më ka folur babai. Ai i shkreti nja tre muaj rrjesht blinte biletën që të nisesha të hënën për Stamboll”, rrëfeu Xhelilaj.
Për sa i përket karrierës, Niku zbuloi se së shpejti do të shfaqet me një rol episodik në një serial gjerman, i cili do të dalë në muajin mars në “Amazon Prime”. “Projekti më i ri do të jetë një serial gjerman, do të jetë një rol episodik, i cili titullohet “We Children From Bahnhof Zoo”. I frymëzuar nga libri me të njëjtin emer i vitit 1978, i cili është përshtatur edhe më parë në film. Në këtë projekt nuk do të kem rolin e protagonistit, por do të jem në çdo seri. Seriali del në mars, në Amazon Prime”, tregoi aktori shqiptar.
