Autoritetet e policisë doganore e të Guardia di Finanza italiane kanë sekuestruar disa flakone të vaksinës Astrazeneca që po tranportoheshin ilegalisht nga Italia drejt Shqipërisë. 30 dozat u gjetën në një çantë frigoriferi në zotërim të dy shoferëve me dokumente gjermane, por me origjinë iraniane, që po udhëtonin me tragetin e linjës nga porti i Barit drejt Shqipërisë.
Shoferët iranianë janë Abdolraim Orangui Asr dhe Ghassen Farhadi 69 e 73 vjeç, të cilët po udhëtonin me një makinë të tipit “Volvo” në tragetin “Aurelia” me destinacion Durrësin. Flakonet janë të serisë ABË4330 me skadencë në korrik 2021. Ndaj kësaj ngjarje ka nisur një proces hetimor. Sipas prokurores Luisiana Divittorio po punohet të zbardhet se çfarë ka ndodhur.
-Kush ishin porositësit e vaksinës?
-Kush mundësoi marrjen e tyre?
-Pse po mbërrinin në Shqipëri transportuar nga shtetas me origjinë iraniane? Këto pyetje priten të marrin përgjigje nga hetuesit italianë. Numri i serisë që përmban çdo flakon do të ndihmojë të gjendet prejardhja e tyre. Dy shoferët janë denoncuar për grabitje e trafik të paligjshëm e po hetohen në gjëndje të lirë. Ndërsa tre flakonat e vaksinës Astrazeneca janë sekuestruar.
