Konvikti i vajzave në Vlorë, falë një investimi të qeverisë shqiptare në kuadër të Paktit për Universitetin është tashmë gati sipas kushteve më të mira bashkëkohore, teksa në këtë godinë nuk ishte vënë dorë që prej vitit 1960-të.
Ministrja e Arsimit, Sportit dhe Rinisë, Evis Kushi, e shoqëruar nga kryetari i bashkisë së Vlorës, Dritan Leli dhe deputeten Vilma Bello panë nga afër punën që është bërë për rehabilitimin e këtij konvikti.
Ministrja Kushi tha se “ky konvikt është model dhe standardet e tij do të plotësojnë nevojat dhe rehatinë e 240 studentëve me mobilim dhe orendi shumë të mira, dhoma dyshe e treshe të standardizuara, dhoma të konceptuara për personat me aftësi ndryshe, kuzhina gatimi në çdo kat, salla studimi, depo, lavanderi, kaldajë, magazinë depo uji, shkalla emergjence, Wifi & monitorim me kamera sigurie, sistem mbrojtjeje kundra zjarrit etj.”.
Ndërtesa, e cila më parë ishte e amortizuar, është kthyer në një mjedis modern dhe bashkëkohor për 240 studentet e saj. Rikonstruksioni i godinës së konviktit ishte investim i qeverisë shqiptare, me vlerë 77.000.000 lekë dhe është i pari i këtij lloji që parashikoi rikonstruksionin rrënjësor. Godina i përket viteve ’60 dhe prej atij viti nuk ishte bërë asnjë investim.
