Autoritetet angleze kanë nisur një operacion kërkim shpëtimi në East Cowes, pasi një traget u përplas me dy jahte. Aksidenti mes mjeteve lundruese ka ndodhur disa metra larg bregut. Në operacion u angazhua edhe një helikopter kërkim/shpëtimi, por u detyrua të kthehej për shkak të dukshmërisë së ulët si pasojë e mjegullës së dendur.
Agjencia Detare tha në një deklaratë se kishte marrë thirrje për ndihmë nga një person. Ekipet e emergjencës kanë fokusuar kërkimet edhe për persona nën ujë. Në vendngjarje kanë shkuar edhe rimorkiot, për të tërhequr drejt portit tragetin dhe dy jahtet e përplasura. Zyrtarisht nuk ka informacion nëse ka viktima apo persona të lënduar nga dy jahtet, shkruajnë mediat angleze.
Kurse në bordin e tragetit ndodheshin 56 persona, të cilët raportohet se janë në gjendje të mirë. Paraprakisht dyshohet që përplasja të ketë ndodhur për shkak të mjegullës. Duke mos pasur shikueshmëri të qartë, trageti përplasi jahtet kur po tentonte të hynte në port.
